Welcome to Louis Galea's Website


Il-Gvern żied b'mod sostanzjali l-vot għat-taħriġ ta' l-għalliema. F'din il-leġislatura se jkunu intefqu kważi miljun lira f'taħriġ meta mqabbla mat-30,000 fis-sena li kienu jintefqu taħt Gvern Laburista. Sar investiment massiv ta' aktar minn Lm 8 miljuni fl-infrastruttura teknoloġika fl-iskejjel.

	Illum fl-iskejjel tal-Gvern hemm aktar minn 5,500 kompjuter, dawn il-kompjuters kollha ġew networked biex ikunu jistgħu jikkomunikaw bejniethom u mal-bqija tad-dinja permezz ta' l-Internet u l-e-mail.

Fil-livell primarju hemm kompjuter għal kull seba' studenti, kif ukoll monitor u video recorder f'kull klassi. Fil-livell sekondarji hemm laboratorji tal-kompjuter skond il-popolazzjoni ta' l-istudenti. Kull għalliem għandu laptop biex jipprepara l-lezzjonijiet u materjal edukattiv. B'hekk l-iskejjel Maltin għandhom wieħed mill-għola livelli ta' riżorsi teknoloġiċi fl-Ewropa. Kull student se jkollu indirizz postali elettroniku (e-mail) tiegħu u spazju biex joħloq website. Kull skola ingħatat l-ispazju għall-website tagħha.
Il-Gvern qed jaħdem biex l-istrutturi edukattivi f'pajjiżna jkunu jistgħu joffru edukazzjoni tul il-ħajja. F'pajjiżna diġa għandna diversi opportunitajiet ta' edukazzjoni għall-adulti u għall-anzjani, madankollhu hu mistenni li dawn jiżdiedu kif ukoll jinħolqu aktar opportunitajiet ta' taħriġ għal dawk li qed jaħdmu u jixtiequ javvanzaw jew ibiddlu l-linja tax-xogħol u għal dawk li jixtiequ jitħarrġu mill-ġdid.

Il-Gvern qed jagħti Lm 500,000 fis-sena bħala għajnuna lill-ġenituri li jibagħtu lill-uliedhom fl-iskejjel privati indipendenti f'forma ta' tnaqqis mit-taxxi. Lm 10 miljun fis-sena f'għajnuna lill-iskejjel tal-Knisja.

	Aktar minn 11,000 student qed jibbenefikaw minn Lm 8 miljun fis-sena bħala stipendju. Il-Gvern daħħal sistema ta' stipendji li tkopri aktar studenti u li tagħti għotjiet supplimentari għal dawk li l-aktar għandhom bżonn. Il-Gvern daħħal ukoll sistema ta' Smart Cards biex jiżgura li parti mill-għotjiet li jingħataw l-istudenti jitefqu fuq materjal edukattiv u b'hekk flus il-poplu jintużaw sew.

Appoġġ kontinwu u investiment f' servizzi speċjalizzati kemm għal-tfal li jkollhom diffikultajiet biex jitgħallmu kif ukoll għall-ġenituri tagħhom permezz ta' programmi edukattivi ġodda. Twaqqfet il-Fondazzjoni għal Servizzi Edukattivi biex toffri programmi ta' appoġġ edukattiv fl-iskejjel tal-Gvern. Il-Fondazzjoni diġa qed twettaq il-programmi tagħha b'suċċess u fl-2002 il-Fondazzjoni bdiet toffri s-servizzi tagħha f'għoxrin ċentru madwar Malta u Għawdex.

L-iskop tal-Fondazzjoni għal-Servizzi edukattivi hu li permezz ta' programmi edukattivi interattivi u interessanti jinvolvu lit-tfal permezz tal-programm Ħilti u lill-familji tagħhom permezz tal-programm Id f'Id biex jitnaqqas ir-riskju ta' falliment edukattiv, jiżdied il-litteriżmu u jonqos l-assentejiżmu.

Bdew jinħatru l-Activity Teachers, tip ġdid ta' għalliema li jiżviluppaw it-talenti tat-tfal permezz tad-drama, mużika, arti eċċ. Dawn l-għalliema se jkunu qed jaħdmu ukoll wara l-ħin ta' l-iskola biex iwettqu l-programmi tal-Fondazzjoni għal Servizzi Edukattivi. Il-Fondazzjoni għal Servizzi Edukattivi kisbet ukoll somma ta' Lm 12,000 mill-HSBC Cares for Children Fund biex jitwettaq il-proġett Ħilti Teżor li permezz tiegħu bdew jiġu żviluppati kotba bil-Malti għal tfal ta' bejn l-4 u t-8 snin. Il-proġett jaħseb ukoll biex il-ħaddiema tal-HSBC ikunu imħarrġa u nvoluti f'skema ta' volontarjat biex jgħinu lit-tfal fil-qari. Proposta tal-Fondazzjoni għal Servizzi Edukattivi dwar għajnuna lit-tfal u l-familji tagħhom intlaqgħet mill-Kummissjoni Ewropea u kien deċiż li tiġi finanzjata u addottata f'pajjiżi oħra Ewropej. Il-Fondazzjoni se tkun qed tmexxi il-proġett 'Parent Empowerment for Family Literacy - PEFaL' hi stess u se tkun qed tikkordina l-proġett f'numru ta' pajjiżi Ewropej. Għal dan il-proġett ġew allokati Lm 70,000 mill-UE.

	Il-Gvern introduċa diversi policies biex jipproteġi lit-tfal waqt li jkunu l-iskola. Il-Gvern ippublika Kodiċi ta' Dixxiplina, politika dwar l-Ibbuljar, proċeduri dwar l-abbuż tat-tfal u politika dwar l-abbuż minn sustanzi perikolużi bħad-droga u l-alkoħol. Saret politika ġdida dwar l-inklużjoni ta' persuni b'diżabilita' li taħseb għal pjan edukattiv individwali għal kull student b'diżabilita'. Bħalissa fl-iskejjel hemm madwar 500 facilitator ma' 630 student.

Twaqqaf il-Kulleġġ Malti għall-arti Xjenza u Teknoloġija - l-MCAST L-MCAST fetaħ il-bibien tiegħu f'Ottubru ta' 2001 b' Sitt istituti ġodda. Il-Kulleġġ kien maħluq biex joffri edukazzjoni vokazzjonali ta' kwalita' kemm lill-istudenti li jridu jkompli jitħarrġu kif ukoll għal dawk li telqu mill-iskola u jixtiequ jkompli jitħarrġu jew jitħarrġu mill-ġdid. Illum l-MCAST joffri 33 kors full-time u 60 kors part-time. Aktar minn 2,500 student qed jattendu wieħed mill-korsijiet li joffru l-istituti tal-kulleġġ.

	Twettqet riforma fl-iskejjel tas-snajja u t-tagħlim ta' l-Edukazzjoni Teknoloġika. Infeħu 27 workshop ġdid, b'investiment ta' Lm 5000 kull wieħed, biex l-istudenti li jixtiequ jitgħallmu dan is-suġġett ikunu jistgħu jagħmlu dan fl-iskejjel sekondarji. B'hekk twaqqfet ix-xejra negattiva li kien hemm fl-iskejjel ta' l-Isnajja li kienu qed imutu mewta naturali.

It-tagħlim ta' l-Edukazzjoni Teknoloġika issa se jinfirex fl-Iskejjel Sekondarji u l-Junior Lyceums kollha u eventwalment jinfirex ukoll fil-livell primarju.

Il-Gvern waqqaf il-Fondazzjoni għall-Iskejjel ta' Għada biex fi żmien tmien snin l-iskejjel kollha tal-Gvern ta' Malta u Għawdex jiġu immodernizzati u jinbnew l-iskejjel ġodda li hemm bżonn. Għal dan l-iskop se jsir investiment ta' aktar minn 60 miljun. Il-Fondazzjoni twaqqfet bl-iskop li l-ambjenti ta' l-iskejjel tal-Gvern jitjiebu għall-livelli mitluba mill-Kurrikulu Nazzjonali, ambjenti li jħeġġu t-tagħlim. Il-Fondazzjoni trid twettaq programm aċċellerat ta' xogħlijiet biex fi żmien qasir u b'użu aħjar tal-fondi pubbliċi pajjiżna jkollu skejjel ta' l-għola livell.

	Il-Fondazzjoni diġa bdiet twettaq diversi proġetti. Il-proġetti jinkludu it-tisbieħ tal-klassijiet u l-bini ta' l-iskola - s'issa saru xogħlijiet f'42 skola, titjib tal-faċilitajiet rikreattivi - 12-il proġett, u xogħlijiet biex l-iskejjel isiru aċċessibbli - s'issa bdew 79 proġett. Tul l-erba' snin li għaddew saru xogħlijiet ta' tisbieħ u manutenzjoni permezz ta' 160 inizjattiva f'100 skola madwar Malta u Għawdex. Minn mindu bdiet topera l-Fondazzjoni għall-Iskejjel ta' Għada saru u qed isiru xogħlijiet f'50 Skola Primarja, 24 Skola Sekondarja u Junior Lyceums, tlett kumplessi ta' l-iskejjel u sitt skejjel speċjalizzati.

Skejjel Primarji		Skejjel Sekondarji u Junior Lyceums
Attard	Pembroke	B'Kara, Vincenzo Borg Brared BSS
B'Bugia A	Pieta	Cospicua, Erin Serracino Inglott GSS
B'Bugia B	Qormi, San Bastjan A	Cospicua, Giuseppi Despott BSS
B'Kara A	Qormi, San Bastjan B	Gzira, Antonio Bosio BSS
B'Kara B	Qrendi	Hamrun, Adelaide Cini GSS
Cospicua	Rabat A	Hamrun, Dun Guzepp Zammit BJL
Dingli	Rabat B	Hamrun, Maria Assumpta GSS
Floriana	Safi	Hamrun, Maria Regina GJL
Gharghur	San Gwann A	Marsa, Fra Diego Bonanno
Ghaxaq	San Gwann B	Marsa, F.X. Attard BSS
Gudja	Santa Venera A	Marsa Dun Gwann Mamo
Gzira	Santa Venera B	Mosta, Lily of the Valley GSS
Hamrun SS	Siggiewi	Mtarfa, Sir Temi Zammit BSS
Luqa	Sliema	Naxxar Higher Secondary School
Marsa	Valletta	Paola, Guze D’Amato BSS
Marsascala	Vittoriosa	Qormi, Guze Galea BSS
Marsaxlokk	Żabbar A	Santa Lucia, Margaret Mortimer GJL
Mellieha	Żabbar B	Pembroke, Sir Adrian Dingli GJL
Mosta A	Żebbug A	St. Andrews, Sir Luigi Preziosi, GSS
Mosta B	Żebbug B	Sta Venera, San Frangisk ta’ Assisi BSS
Mqabba	Żebbug C	Sta Venera, Vincenzo Bugeja BSS
Msida	Żejtun A	Żebbug, Dun Karm Psaila BSS
Naxxar	Żejtun B	Żejtun, Carlo Diacono GSS
Paola A	Żurrieq A	Żurrieq, Mons. P.P.Saydon BSS
Paola B	Żurrieq B

Il-Fondazzjoni bdiet taħdem ukoll fuq proġetti kbar bħal dak tal-Junior Lyceum Sir Adrian Dingli f'Pembroke, ta' l-iskola primarja tal-Gżira ta' l-iskola ta' Marsaskala u oħrajn. Qed isiru wkoll il-preparamenti biex tinbena skola sekondarja ġdida u Kumpless Sportiv Reġjonali fil-Karwija bejn Ħal-Safi u Ħal Kirkop kif ukoll skola sekondarja ġdida fil-Mosta.

Il-Ministeru u l-Federazzjoni ta' l-Industriji (FOI) daħlu għal inizjattiva flimkien imsejħa Education Business links. Permezz ta' din l-inizjattiva bejn iż-żewġ partijiet, sitt skejjel sekondarji daħlu fi ftehim u ssieħbu ma' kumpaniji jew industriji bl-iskop li l-istudenti jieħdu esperjenza ta' xogħol u jkunu aktar preparati għad-dinja tax-xogħol.

	Il-Ministeru ta' l-Edukazzjoni u l-Ministeru tal-Politika Soċjali, flimkien waqqfu l-Kunsill Malti għall-Kwalifiki Professjonali u Vokazzjonali biex pajjiżna jkollu l-mekkaniżmu meħtieġ biex jistabbilixxi l-istandards u biex jikkonvalida l-livelli ta' korsijiet u taħriġ professjonali u vokazzjonali f'pajjiżna.

Permezz ta' l-impenn tal-European Union Programmes Unit (EUPU) diġa' qed nipparteċipaw bis-sħiħ fil-programmi edukattivi ta' l-Unjoni Ewropea. Dan qiegħed isir għaliex Malta kienet fil-proċess tan-negozjati għal sħubija ma' l-Unjoni Ewropea.

Malta ipparteċipat fil-programmi Socrates, Youth, Leonardo Da Vinci u l-Fifth Framework li huma programmi li jiffukaw fuq setturi li jvarjaw mill-qasam ta' l-edukazzjoni għall-fabbriki, mix-xjenza u t-teknoloġija għal-programmi ta' volontarjat. Minn mindu bdejna nipparteċipaw fil-programmi ta' l-UE, aktar minn 1500 persuna u aktar minn 150 organizzazjoni ibbenefikaw direttament minn wieħed mill-programmi. Dawn kienu jinkludu tfal, għalliema, żgħażagħ, studenti ta' l-Universita', ħaddiema tal-fabbriki, riċerkaturi, xufiera tat-taxi, impjegati fil-qasam tat-turiżmu u ħafna oħrajn. Fis-sena 2002 ipparteċipaw:

Aktar minn 500 student ta' l-Universita' jagħmlu żmien ta' studju f'36 universita' fi ħdax il-pajjiż Ewropew. Dan ifisser 12% ta' l-istudenti eliġibbli qed jagħmlu din l-esperjenza.

Diversi skejjel primarji u sekondarji qed jipparteċipaw fil-programm comenius biex it-tfal isiru jafu dejjem aktar dwar il-pajjiżi ewropej, ġirien tagħna. It-tfal u l-għalliema jissieħbu ma skejjel oħra biex flimkien jagħmlu proġetti ta' ġid għalihom u għall-kommunita'.

	Aktar minn 1000 żgħażugħ u żagħżugħa ipparteċipaw fil-programm Youth. Fl-2002, 333 żgħażagħ minn 21 organizzazjoni lokali marru f'pajjiżi ewropej jew laqgħu żgħżagħ minn dawn il-pajjiżi u żviluppaw attivitajiet ta' interess għalihom u għall-kommunita' ta' madwarhom. 148 żgħażgħ oħra wettqu proġetti immexxija minnhom stess u 96 żgħżagħ ipparteċipaw f'seminars internazzjonali u korsijiet ta' taħriġ.

Madwar 250 student u ħaddiem Malti marru f'pajjiżi Ewropej u ibbenefikaw mill-programm Leonardo da Vinċi. Il-ħaddiema kienu jinkludu fost oħrajn ħaddiema fil-qasam tat-turiżmu, xufiera tat-taxi, ħaddiema tal-fabbriki u oħrajn. 43 proġett ta' riċerka u żvilupp taħt il-programm Fifth Framework Programme. Il-proġetti jkopru l-oqsma tal-kwalita' tal-ħajja, ta' l-informazzjoni s-soċjeta' u t-teknoloġija, l-iżvilupp, l-eneġija, l-ambjent u l-iżvilupp sostenibbli, l-innovazzjoni u l-SME's u l-iżvilupp tal-potenzjal uman.


	Proġetti - Edukazzjoni